Udto sa Sirong (kan Tabaco Supermarket)

Ipagayon an hapon

kan mga nagsasaraod na daragang

mga taga-ibong,

sa saindang gubing

na kun bakong sobrang pula

sobrang lungsi,

kun bakong sobrang laba,

dai pang laba.

Mahamot talaga

an bagong hakbot

sa RTW, parong plastik

buda alkampor, lalo na kun perla pa

an pinanghugas sa unit.

Sinda ang piguurulukan

kan mga taga-sentrong tambay

pirmi daa panong garo ma-simba,

ma-bayle, ma-diskarte.

Sa harayo, yurpyop na an mata

kan para-prutas sa kauubak ki aranghita,

pigsasabudsabudan siya kan saiyang aking

nurunuun na an sipon sa kangangawngaw

sa duso kan nagdudumig na rungas

sa kakadalagan sa rampa paitaas.